اوع من الكورونا

اوع من الكورونا
 

فاطمة محجوب كرار

الحمد لله انه مع لغوستنا فى السنوات الأخيرة الفائتة، لم يصل بنا الحال حد اكل الخفافيش والعقارب والثعابين والتى قيل فى وسائل التواصل -الاقطع واديك دى -انها احدى احتمالات مسببات وباء الكورونا،  كلها مجرد لحم حمار حمارين او كلب وكديسة فى اقاشى اوشاورما أومجموعة خيش و صراصير دائبة فى حلة تقلية او كمونية فى مطعم ما، وجداد من فئة مكتول الله ذبح وبيع كيمان كيمان.
وقيل أيضا انها لا تصيب الافارقة ...احمدو الله وخلونا من جدنا فلان ويصل نسبنا لفلتكان ...ولكن... يبدو اننا اكتشفنا علاجها ... فاحدى الهايسات المهكعة والمركونة فى السوق المركزى سمعها البعض ومكرفونها يصدح  بصوت عال وبثقة زائدة .... الرطوبة... الصداع النصفى ...حصاوى المثانة ....الكورونا ...دلللللل ....وبلادى سهول بلادى حقول  ....وهييييع ثم هييييع.
والشر برا وبعيد ....وبعيدعنكم ....وبسلامتكم وكل عبارات التفاؤل المابتحلك دى ، تخيلت  ان الكورونا وصلت لعندينا ....دا كان ما كم واحد هسه شايلها وحايم بيها ، ستنتقل بسرعة البرق  نتيجة لعدد من الممارسات اليومية نورد بعضها:-
-التفتيف ...فنحن مغرمون به جدا، وماعارفة ليه  فبين كل ثلاثة يمشون فى الشارع واحد ببزق ساكت كدا .
- التخلص من السفة كيفما اتفق ...فى سوق الخضار وبالقرب من الخضروات- دا كان ما الخضرجى ذات نفسو- ...من شباك الحافلة ....فى الحوش ...تحت شباك المدرسة ....وللسفة طرق كثيرة يتخلص بها صاحبها من الخشم خلى بالك.
-تداول العملة الورقية فقروشنا الزى الدلاقين دى  وسخانة وسخ شديد  كما اننا نستعمل فى عدها (الريق).
-عدم اهتمامنا بغسل اليدين ويندرج تحتها كل البلاوى الاستعملت يدك فيها وكل الحاجات المسكتها.
-لغاويس الشارع فالكل جائع ويتصبر بى حاجة مع لطعة المواصلات ...فول مسلوق ...ذرة مسلوقة ....قصب....منقةبالشطة ..دردقو وهو الدردقو منو؟........الخ
-طريقتنا فى الاكل الجماعى وفى طبق واحد....والنبى فيك اشرب موية السلطة دى طاااااعمة .
-دا غير العطسى والتمخط دون استعمال اى ساتر ...اتشووووو على الهواء مباشرة ...وآخر استمتاع ....كان عندى جارة الله يطراها بالخير بنسمع عطستها .....رحمك الله ياخ.
-باقات العصير الفى السوق و(كيزانه) المعلقة فى طرف الجركانة والسبيل الغطاه اتسرق .
 وكتير من الممارسات.
من محاسن الاصابة بالكورونا انه حنقعد فى الحجر الصحى والاكل مجان  لا مشاوير ولا مجاملات .....لا دفير مواصلات ولا نشل تلفونات....تموت... ناس الدعم السريع يجوك  ارفعك ارفعك ادفنك كب التراب... فحط....عشان كدا الاسم لايق عليهم .
السيد حمدوك يتفكا من المصيبة العلقوها ليه فى رقبتو دى.
كر كر كر ....فال الخلا.