حضور الغياب

*

................

 حضور الغياب

إلى روح معلمي واستاذي د. عزالدين هلالي.

سحر عثمان شرف

و رحلتَ
يا حلو السمات
زي رفة الطير الحزين
زي ومضة السنا
من سكات..
زي نجمه من فوق تاوقت
برقت علي الناس بالفرح
ولمت ضياها وسافرت
قبل الصباح يدلق
بهاهو علي الربى
وتعلن تباشيرو الوصول..
اخترتَ ليه بدري الٲفول
لسا المسافات ما انطوت
لسا القصايد ما ارتوت
لسه (النصيحه) الغاليه
محتاجاك تقول..
يا موسم الطل والربيع
يا مشرع النيل الوسيع
لسا الزمن في (طبعو)..
والاوجاع كتار
واهو ده الزمن
بسكب عصارات الشجن
وبختار من الناس الخيار..
ولسا الوطن
يا باهي محتاجك كتير
لي شِعرك العذب الزلال
لي قوة الراي والمقال
لي فكرك  الواضح
وضوح الشمسِ لما
نهار تبين..
لي طرحك الهادي الرزين
لسا الغلابه المتعبين
ايدهم علي نبض الوجع
وعينهم علي القيف
من سنين..
ورحلت مسكون بالحنين
شايل الصدق في
ايديكا زاد..
متلفح النيلين وشاح
ومحبة الناس والوداد..
الطيبة والطبع السمح
الكلمة والمعني الرصين..
نخلات وٲبنوسه وقمح
عشم التعابه الكادحين..
شرف المداد الما انسكب
غير للحقيقه وللجمال
ورينا كيفن يا هلال
كيف القضيه تعيش دهر
والفكره تحيا سنين طوال
ورينا يا طيب الٲثر
السيرة كيف بتهِل قمر
والذكرى تتبتق زهور..
ورينا كيف نقش الحجر
بصمد علي مر العصور
ورينا كيف بعض البشر
من بعد ما تغيب طلتا
وتصعب علي الناس شوفتا
تفرض بهاها و روعتا
وتتجلى
بين الناس حضور...

..........
سحر عثمان شرف