أنجع الوسائل في مسح ارقام الحريم من الموبايل 

أنجع الوسائل في مسح ارقام الحريم من الموبايل 

فاطمة محجوب كرار

نحن السودانيون نتعارف بسهولة شديدة ، ففي مناسبة ما احيانا يتم التعارف في جلسة ونسة بينك و بين جيران ابنة عمك فتستلطفين إحداهن فتعطيك رقم هاتفها مع وعد بالاتصال و المواصلة و عيييييك و هكذا .. والنساء من طبعهن الانبهال و الفضفضة ، ومن الممكن جداً ان تحكي لك امرأة (ممغسة) كل ما تعانيه من ضغوط أسرية باعتبار انك امرأة غريبة لن تقابليها مرة اخرى .. يحدث هذا لكل حريم الدنيا ومن كل الجنسيات ، كما يحدث ان تتعرف على شخص و لكنك لسبب ما لا تستلطفه و لكن الظروف تجبرك على التعامل معه .. قريبك ... احد الانسباء .. مقيم مع جيرانكم .. الخ .

تذكرت فجأة انني اعرف عددا من الأشخاص عرفتهم بذات الطريقة ، فقررت ذات زهجة ان أبدا ب(كنصلة) عدد منهم .. سأبدأ ب(نجاة) ، فهي بعد سلام و تحية باردتين تنبطح على اقرب سرير دون احم او دستور التقول حامل.. كلاما قليلا و براااااحة تضطر معه للتركيز و تفعيل حاسة السمع لديك مع القول مرة:
- آآآقتي شنو ؟؟
وبحكم انها ضيقة فمن الاتكيت ان تلاغيها ، بمعنى تساليها عن أحوالها و احوال اللي خلفوها ، حاقعد الوليها كدا لمتين ؟!! .... دي تتكنصل طوالي .

اما (نادرة) ففايقة و رايقة ، دائماً ما تفاجئك بالزيارة دون ميعاد و تختار كرسيا مريحا تتوهط فيه بمزااااج و هي مسترخية غير عابءىة بشىء ، و العجب اذا اتبسطت معها في الكلام عندها تنطلق شعرة جلدها ولي بكرة ما حتقوم .. عليك الله شوف زي دي .. تقول ولدتها و نسيتا .. حاكنصلها !.

نجي لي ( جليلة) .. بساطها احمدي و دائماً جيعانة و لم تفطر عند أهلا ، فتبادر بفتح الثلاجة و تدخل رأسها و هي منحنية تشير بأصابعها :
- داااك شنو ؟ 
فتقولي مثلا:
- اظنو محشي
فتقول بانبساط: 
- المحشي لامن يتاكل بارد مبااااالغة طلعيهو !!.

( علوية) شحادة جنس شحدة من النوع الذي تسارع بإخفاء أشياءك من مرمى بصرها .. كريمات .. عطور .. شبشب و هي في ذلك تشبه عائشة الا ان الاخيرة تسحرك بكلام معسول ، و هي خارجة تكون قد استعارت ثوبك المسمى - توب مرة الوالي- و الذي لاتعيريه لأحد وفي اليد الاخرى تحمل علبة باكنباودر و بيضتين .

( حياة) حكايتها حكاية .. تدخل عليك و تلقي بسلسلة من التنظيرات :
- انتي يا اسمك .. لو السراير ديل غيرتي وضعهم يكون أحسن .. الكرسي دا جيبيه في الركن .. الدولاب دا مافي ليه اي داعي هنا .. البوهية دي لو غيرتوها بابيض حتدي وساع للاوضة .

(احلام) ربرابة و كنت أظنها وناسة و لكن ان تظلي طول زيارتها تهزهزي في رأسك و لا تجدين اي فرصة للكلام ، مع ملاحظة انك في بيتك و حتى لو حاولت مقاطعتها فإنها تسكتك برفع صوتها .. أنتو دي اللمتني فيها منو ؟؟!!

(رقية) طيبانة تدخل توووشك اذا وجدت الباب مفتوحا و تبدأ في المناداة بصوت عال فتضطرين للاستجابة ، فهي تعاني من عطب في سمعها ،، لكن بصراحة فترت منها .

كل النسوان ديل حاكنصلهم .. مسيخة مسيخة .. كدي بعد دا نشوف قائمة الأسماء في التلفون .. (نايلة اخت سيدة) دي منو ؟؟ هي سيدة زاتا منو ؟ ما اتذكرتها .. مسح .
(حواء الجعلية) دي مكتوبة لي هسع ، ما اشترينا منها الآبري زماااانك .. مسح !!..
(النور راجل فتحية) الراجل دا (فتحية) احرجتنا معاهو لما تسعى ليها موبايل زي الحريم نبقى نسجلا ... امسح طوالي .
(عابدة) دي منو ؟... و (سمية ن) دي ما يعرفها امسح ... والله يا اخوانا الزول بعد دا يشبع نوم في عضمو دا ، و كمان الموبايل بقا خفيييييف !!..