أغنية جديدة
أغنية جديدة حلم بكره سحر عثمان شرف ........ حنرجع تاني نتقالد ونتسالم سلام الايد حترجع دخلة الحيشان
myasinplatformltdcom
يونيو 16, 2020 01:19
1750
0
أغنية جديدة
حلم بكره
سحر عثمان شرف
........
حنرجع تاني نتقالد
ونتسالم سلام الايد
حترجع دخلة الحيشان
علي الجار القريب وبعيد
حترجع بسمة الٲعياد
ولمات الحسان الغيد
ح يصبح حالنا طيف ذكرى
وكت نتلاقى ليها نعيد
حنتونس مع الٲحباب
وسط ضحكات وقهوه وشاي
نخت كرسي الفرح بهناك
وكرسي الٲمنيات بي جاي
حنفتح بابنا للفرحه
وللٲمل البلوّح جاي
ولا بنعتب علي الٲيام
ولا نقول الزمن قساي
حنتكلم كلام الروح
ونحكي كتير عن العدى
حنفتح ضلفة الٲشواق
وبابا الٲصلو ما انسدا
حتهدينا الزهور طيبا
عبير النسمه والورده
عيوننا حتبدا بالترحاب
قبل ايدينا تتمدا
حتعرفنا الدروب تاني
وكت تحضن خطاوينا
شوارعنا و ضواحينا
نحييها وتحيينا
عليها اللهفه تاخدنا
وخطى الٲشواق تودينا
نغني مع الحنين غنيه
ونوقع شوق ..ٲسامينا
.......
