كلام لي زينب بي محمود

كلام لي زينب بي محمود

محمد نجيب محمد علي

ساكت ساي

بتامل في الفات والجاي

ومتالم جد يا زينب بت محمود

وانا لا غناي

لا بعرف اعزف عود

لكين وحياة الخلق العالم

وسط العالم انا موجود

ومبلغ عني

باني

من يوم ميلادي
وانا مفقود

والاعجب
عنواني مدون تحت بلاغ الفقدان
وصورتي الشمسيه

وسيرتي الشخصيه

حتي وحاجاتي السريه

مما قمت لحد الان

تذكري يا زينب بت محمود
دقيت علي بابك دقيت
وفتحتي الباب

عاينت لقيت الباب مسدود

وسمعتك بتقولي حباب

اتفضل
ماعرفت الصوت طالع من وين

واتلفت شمال ويمين
وطلعت عشانك سلم من دورين

بحلقت عيوني ولكن اه

ما قدرت اشوف
كنت بشم في ريحة الخوف

ريحة الخوف زي الفانوس لما يبقبق

زي انسان شارد من ضلو ومتعلق

زي قلب مجرح ومخطوف

يا اول حلم بيكسر قيد الدمعه الجوه الجوف

يا اخر دمعه بتبني طوابق من احزان

انا حيران

ما عرفت بداية السكه

وين يازينب باب الضحكه

وانا وين ما اعاين اشوف دخان

اسكت

للحيطان اذان

اصوات من جوه براها بتتكلم
اناما مجنون يا زينت

لكن حاسس انو العالم بتالم

حاسس بي حاجات جواي

تناطح في حاجات

ما عارف ليه

والمارد محبوس

ما عارف المارد محبوس في ايه
وما عارف كيف
انو الدنيا شتا

وانا حاسس انها صيف

وانو عيوني بقت ما تعاين لي قدام

اتغير شكل العالم بره وجوه
الخوه بقت ما خوه
وكل صقور الدنيا بقينا
نشوفها حمام
حتي الحرب
بقينا نسمي الحرب سلام

وكلو تمام

وانا يازينب

لما رميت سنارة الصيد ما صادت

وحتي جدادة البيت

الكان بتبيض

ما باضت

وديكنا الكان بياذن في كل يوم

بقي بينوم

ااخ يا زينب ااااااااااااخ

اخ من زمنا فينا ومافي

وااخ من ولدك لابس وحافي

واااخ من وطنا واسع وشاسع
لما يكون لي ناسو منافي

كوب اللبن الصافي اتعكر

ولسه نقول اللبن الصافي

كبرت فينا احزانا وشابت

ولون الشيب ما ابيض اسود

والاحزان جوانا تعمر
وكل العمر معاها اتبدد

عندك حل

لو عندك حل يا زينب قولي

انا قدامك واقع طولي

خمسه في خمسه بقت عشرين

وخمسه وخمسه بقت اتناشر

ووين يازينب فاطنه السمحه
ووين يازينب حسن الشاطر
شوفي الجونا يبيعوا المويه
ونحن النيل بنسوي حفاير

ونحن ونحن الشرف الباذخ

وما بنبيع مركوب الفاشر

ااخ يازينب