اعقلوها يا جماعة

اعقلوها يا جماعة

فاطمة محجوب كرار
******

كابوس مزعج هذا الذى نعيشه جميعا ....عدو خفى يواجهه العالم ...  لذلك ينتاب الشخص شعور غريب ...مزيج من خوف ... يقين.... مع ايمان بأن لن يصيبنا الا ما كتب الله لنا...ولكن يجب ان نعقلها  ونتوكل...
الحبسة حاااارة للرجال والشباب ولكن عليهم ان يتحملوا ....(ابونا)صرت اشاهد فى عينيه نظرة الأسد الحبيس بالضبط وعجبت كيف تتحول النظرات من نظرات وادعة (زول طيب شديد)هههههههه قولوا لى خفتى    ....الى نظرات غريبة بالجد والله ...ويقال ان بعض الرجال كاد أن يجن ..كما ان نسبة الطلاق فى عدد من دول العالم فى زيادة ....عشان تعرفو انو نحن طيبات وماساكات خشمنا وبنفوت ونستحمل ....كما ان جونا الحار فى رمضان يساعد على الانخماد .....ونوم الظالم عبادة ....تشعرى بأى بادرة تحرش لفظى ....يعنى جر شكل ....طوالى امشى سوطى عصيدتك ....الحمد لله إننا نحن النساء مافارقة معانا شديد ...وعاجبنى للحوامين والحوامات .....اها وجنس تفف ....هو الحلاق ايام الحظر دا قافل؟  ابنى الأصغر قرر ان التفة اجمل من الحلاقة نمرة واحد التى يعتمدها دائما وس(يخنفس)بعد الكورونا .
الاخبار المؤلمة تترى يوميا وعدد الاصابات فى تزايد والوفيات كذلك .....والانسان يقف عاجز عند سماع هذه الأخبار ....
علينا ان نهتم وان نتبع كل الاجراءات الوقائية لكى لا نتسبب فى عدوى من نحب ،وهذا أقل ما نستطيع فعله.
أعجب من هؤلاء الذين لا زالوا ينفون بشدة وجود الكورونا ...ياخ بالله كورونا شنو؟!!!!!ثم يتمادون فى التحدى.... والله بنمشى التراويح وملصقين جنب بعض كمان ....يقولها الواحد بفخر شديد .....والجاهل عدو نفسو.
عدد من المتسولين يطرقون الباب منذ الصباح الباكر
يوميا ثم يعقبهم عدد من طالبات العمل ....وانت لا تستطيع ان تستخدمهم بسبب هذا الوباء اللعين ....الله كريم عليكم غايتو ....والله ما شقالو حنكا ضيعو.
عدد من قروبات التجميل ماجاب سيرة الكورونا دى فى خشمو... ههههههه شغالات ماسكات الفلفل الحار والطمى وحاجات غريبة... والتوصيل شغال ....وعدد من الفتيات يكتبن بوستات من شاكلة ....انتهزى فرصة الحجر واتجلخى.....جنس ميتة قلب!!!!!!
الصحى صحى كتمت معاه ....الزول المعرس بالدس ...السودانى لا زالت لديه فرصة ان يغشى مرتو التانية عندما يذهب لجلب اغراض البيت، اما فى دول الخليج مثلا حيث عربات الطوارئ والشرطة والكاميرات فى كل مكان  فما عارفة حيتصرف كيف !
رمضان الفائت مر بكل الالم والقلق واختتم بوجع الذين استشهدوا فى ساحة الاعتصام... والآن، ارجو ان تمر هذه المصيبة بسلام وان يتراجع عدد الاصابات والوفيات ...آمين يا رب ......والحمد لله  وإنا لله وإنا اليه راجعون.